Holdsveika þjóðin

Hingað til höfum við getað játað þjóðerni okkar af stolti úti um allan heim - ekki síst í fyrra lífi (lífinu fyrir góðærið). En það hefur heldur betur breyst.

Íslenskir námsmenn í Bretlandi mega til með að segjast vera frá Noregi ef þeir eru spurðir hvaðan þeir komi. Um gervalla Evrópu hörfa menn þegar fólk svarar því til að það sé frá Íslandi. Á Balkanskaganum (þar sem Íslendingar hafa víða notið mikillar virðingar), spyrja menn hvort okkur sé treystandi til að klára samninga sem við höfum gert. Í Asíu neita menn að taka á móti listamönnum okkar.

Það vill enginn koma nálægt okkur. Við erum holdsveika þjóðin í heiminum.

Í erlendum fjölmiðlum er talað um "Íslendingar" þetta og "Íslendingar" hitt. Samt hefur þjóðin sem slík ekki gert neitt af sér.

Sparnaður okkar er farinn. Fyrirhyggjan var ekki til neins. Heimili okkar eru verðlaus og hver veit hver eignast þau þegar upp er staðið. Við erum fangar í skuldafeni sem við hefðum aldrei samþykkt þegar við skrifuðum undir greiðsluáætlanir að lánum okkar. Landið okkar eru orðið að  skuldafanganýlendu. Og orðstír okkar um heim allan hefur orðið fyrir óbætanlegum skaða. Þetta er óbærilegt.

Svo eru þeir til sem undrast að þjóðin vilji láta kalla menn til ábyrgðar....

Vilja ekki íslensku sinfóníuna

Hjónasvipur

En notalegt. Nú fer allt að verða eins og það var áður en Davíð innleiddi frjálshyggjuna. Við aftur að verða sveitó og blönk með eina forskrifaða skoðun.

Ekki þar fyrir, skoðanamunur hefur eiginlega ekki verið merkjanlegur á milli Fréttablaðsins og Morgunblaðsins á seinustu misserum. Útlitslega hafa þau líka stöðugt verið að likjast hvort öðru meira - svona eins og gömul hjón með sterkan hjónasvip.

Það er því alveg óþarfi að halda útgáfu þeirra beggja áfram. Það er bara bruðl að gefa út tvö dagblöð til að koma einum og sama boðskapnum til skila, þótt vissulega sé nokkuð algengt hjá gömlum hjónum með sterkan hjónasvip að annað þeirra byrji á setningu og hitt ljúki henni.

Svo sætt.

 

Fréttablaðið og Árvakur saman

Öryggisráðið

Honum hlýtur samt að finnast við besti kosturinn í Öryggisráð SÞ.

Við gætum til dæmis fengið að fara með fjármálaöryggisdeildina....

Brown: Viðhorf íslenskra stjórnvalda óviðunandi

Afneitun

Í hvaða fjárans veruleika búa íslensk stjórnvöld? Hvers vegna eru þau svona upptekin af því að það megi ekki kalla neinn til ábyrgðar? Hvers vegna kalla þau slíka réttlætisafstöðu hausaveiðar?

 Í Bretlandi hafa menn í gegnum tíðina þurft að segja af sér opinberum embættum þegar þeir verða uppvísir að perónulegum brotalömum og veikleikum. Þar þykir sálfsagt að kalla menn til ábyrgðar á gjörðum sínum. Þar hafa margir ráðamenn sagt af sér af ýmsum pínlegum ástæðum. Hér á landi hefur hins vegar aðeins "einn" ráðherra sagt af sér embætti vegna meintrar spillingar. Það var Guðmundur Árni Stefánsson, sem var á sínium tíma heilbrigðisráðherra. Mig minnir að það hafi verið út af kaupum á teppum. Yfir slíku myndi hver hvunndagsbreti hlæja með öllum kjaftinum.

 Hér á landi eru menn hins vegar úthrópaðir sem kveúlantar, æsingamenn og hausaveiðarar ef þeir minnast á það að einhver beri ábyrgð á þeim smámunum að setja heila þjóð og alla hennar vini á hausinn. Það er komið sér hjá því að svara, röflað um að mál séu flókin og síðan kvartað yfir því að alls óupplýst þjóð "sé að lesa í stöðuna."

Þeir sem ekki segja sannleikann allan og af einurð verða bara að þola slíkan í-stöðu-lestur.

Það er fullkomlega eðlilegt að Bretar séu öskuillir út í okkur fyrir að hylma yfir með fjárglæframönnum. Það er meira en lítið skiljanlegt að þeir skuli ekki sætta sig við að Íslendingar haldi fram ábyrgðarleysi þjóðarinnar og einstaklinga sem henni tilheyra á þvi að almenningur og samfélög í Bretlandi standi frammi fyrir þvi að tapa stórfé vegna gjörninga íslenskra fjármálasnillinga á seinustu árum.

Það getur vel verið að íslensk stjórnvöld séu orðin vön því að geta sagt okkur hér að halda kjafti., við séum æði. Hins vegar eru Bretar ekki vanir slíkum málflutningi frá sínum stjórnvöldum. Þar heita hlutirnir sínu nafni.

 Afstaða Breta er heilbrigð á meðan afstaða og viðbrögð íslenskra stjórnvalda er sjúk.

 Íslensk stjórnvöld eru eins og hrokafullur, meðvirkur maki sem reynir að þrífa skítinn, skömmina og eyðilegginguna sem  alvarlega veikur alkohólisti hefur valdið - og sama hvaða rökum er beitt, allt er öðrum að kenna. Allir aðrir eru fífl, fuglahræður og dusilemnni. Sérstaklega Bretar.

 Væri ekki vænlegast fyrir okkur að hlusta gaumgæfilega á þau skilaboð og þá hugsun sem felst í særindum breskra ráðamanna til að átta okkur á því hvað vanmáttarkennd okkar sem þjóðar hefur leitt okkur á rangar viðbragðabrautir.

Er ekki einmitt núna tækifæri fyrir okkur til að hlusta á aðra í stað þess að afneita staðreyndum, móðgast og kenna öðrum um. Þetta alkohólíska viðbragðamynstur er ekki að afla okkur neinna vina. Þvert á móti. Við erum að hrekja þá frá okkur - hratt og örugglega.

Það er móðgun við almenning í þessu landi að forsætisráðherra okkar skuli leyfa sér að lýsa stjórnvöld á Íslandi óánægð og hneyksluð yfir því að Bretar skuli beita Íslendinga ákvæðum í sérstökum lögum um varnir gegn hryðjuverkastarfsemi.

Það má vel vera að þetta sé óvinveitt aðgerð af hálfu Breta, en - hei - voru gjörningar okkar manna voða vinveittir og djollí?

Mjög óvinveitt aðgerð

Réttsýnn ráðherra

Íslenskur almenningur hlýtur að taka undir þessi orð Browns - og bíða spenntur eftir svipaðri yfirlýsingu frá forsætisráðherra Íslands. Eða, ætlar hann bara að halda áfram að leiða hrunadansinn og svara því einu til að ástandið sé "flókið?"

Það er orðið æði þreytandi að hlusta á íslenska ráðamenn klifa á þessu flækjutali á milli þess sem þeir annað hvort "geta" ekki svarað eða "vilja" ekki svara spurningum.

Ef þeir halda að þeir séu að koma í veg fyrir þjóðar "panik" með þögninni og sem minnstum upplýsingum, þá eru þeir haldnir raunveruleikafirringu.

Hvernig væri að forsætisráðherra legði bara spilin á borðið á blaðamannafundinum í dag - það er að segja, eftir að hann hefur fryst eigur auðmannanna sem hafa komið þjóðinni í þessa úlfakreppu?

Brown: Refsingar fyrir óhóf og ábyrgðarleysi

Blóð og brenna

Mikið var!

Hvers vegna voru eignir auðmanna ekki frystar strax - um leið og ljóst var að hér var allt í kalda koli.

Hvers vegna eru eignir þessarra manna - sem einir halda ró sinni í ósköpunum sem dynja yfir okkur - ekki látnar greiða innistæður í erlendum fyrirtækjum íslenskra banka? Það eru þeir sem hafa mokað peningunum út úr þessum fyrirtækjum til að berast á.

Hvers vegna á venjulegum Íslendingum að blæða til ólífis, horfandi á fátæklegar eignir sínar brenna til ösku á meðan hryðjuverkamennirnir stæra sig af því að hafa náð að stökkva frá borði með gullkistur sínar?

 Eða, áttum við að upplifa létti þegar fréttist að "auðmönnum" þjóðarinnar væri borgið?

Hvert var markmiðið með fréttinni?

Og hafi Davíð Oddsson - sem einn Íslendinga hefur gerst uppvís að einræðistilburðum - ekki frétt það, þá virðist þjóðin þeirrar skoðunar, í auknum mæli, að hann segi af sér stöðu Seðlabankastjóra. En það er nú eins og það er með Davíð og lýðræðið.

Vill seðlabankastjórana burt

Hryðjuverkaviðbrögð

Ekki veit ég hvort okkur Íslendigum var ætlað að móðgast yfir þessari frétt - en víst er að fréttir úr breskum fjölmiðlum eru sérvaldar ofan í okkur. Eina leiðin, hins vegar, til að fá einhverja glóru í það sem er að gerast hér á landi er að lesa breska fjölmiðla, því stefna stjórnvalda hér - sem og taglhnýtinga þeirra, fjölmiðla - er að halda þjóðinni í sem mestri fávisku um það sem er að gerast. Við fáum bara snyrtilegar fréttir um að FME hafi yfirtekið hinn eða þennan bankann.

Það er alveg sama um hvað ráðamenn og bankamenn hér eru spurðir, þeir "geta" ekki tjáð sig um málið og blaðamenn á Íslandi eru annað hvort of fávísir sjálfir, eða of kurteisir við þetta fólk (sem hefur ýmist verið kosið til að halda utan um hagsmuni okkar, eða treyst fyrir peningum þjóðarinnar), til að þjarma að þeim og heimta svör eða upplýsa okku um hvað þagnir þess þýða. Þeir komast endalaust upp með að kenna öðrum um. Nú síðast, forstjóri Kaupþings, sem segir allt Bretum að kenna.

Bresku fjölmiðlafólki er hins vegar alveg sama hvað fjárglæframönnum og stjórnmálamönnum á Íslandi finnst um skrif þeirra og hafa engar áhyggjur af því að hafa vit á hlutunum og fjalla heiðarlega um þá. Þeir eru ekkert feimnir við að útskýra hvers vegna Davíð Oddsson ætti alls ekki að vera seðlabankastjóri - og eru farnir að hæðast að honum.

Sjá www.bbc.co.uk sem dæmi, þar sem hægt er að rekja sig í gegnum miklar upplýsingar og greiningar á ástandinu á Íslandi.

Það hlýtur að teljast rökrétt að beita hryðjuverkalögum á íslensku fjármálafyrirtækin - því afleiðingar hinnar "glæsilegu" íslensku útrásar eru að valda skaða hjá mun fleiri einstaklingum en til dæmis árásin á Tvíburaturnana í New York. Miltisbrandurinn ógurlegi er barnaleikfang í samanburði við skaðann sem græðgi fjármálageirans hefur valdið.

Það er kaldhæðnislegt í þeim vestræna heimi sem hefur lagt ómælda peninga og orku í að treysta hryðjuverkavarnir og -viðbrögð seinustu árin til að utanaðkomandi glæponar geti ekki skemmt eina einustu skrúfu fyrir okkur, að hryðjuverkaárásirnar skuli hafa komið innan frá - úr innsta kjarna þeirra sem okkur hefur verið kennt að treysta fyrir framtíð okkar og gæfu. Þetta eru menn sem hafa sent efnahangslegan miltisbrand í gegnum peningapípur heimsins.

 Það er ekki laust við að manni finnist maður staddur í gamalli þjóðsögu. Íslenskir ráðamenn standa eins og gamall fávís bóndakurfur úti á hóli, skimandi í allar áttir til að tryggja að enginn vaði inn á hans lóð á meðan fáráðurinn, sonur hans, brennir húsin til grunna, með manni og mús.

En svo má auðvitað ekki skamma fáráðinn...

Hryðjuverkalög gegn Landsbanka

Trúverðugleiki fræðasamfélagsins á Íslandi

Jæja, þá hefur rektor HÍ birt niðurstöðu sína eftir að hafa legið undir feldi sínum hugsi lengur en menn hafa áður gert í skráðum heimildum íslenskum. Getur verið að þetta sé rektorinn sem lét það verða eitt sitt fyrsta embættisverk að lýsa því að hennar helsta markmið væri að gera HÍ að einum af hundrað bestu háskólum í heimi?

Á hverju eiga gæði þessa hingað til ágæta skóla að byggja?

Það hefur tekið heila öld að byggja Háskóla Íslands upp og gera hann gildandi meðal menntastofnana á alþjóðlega vísu. Hornsteinn fræðasamfélagsins er vísindaleg vinnubrögð (til dæmis við meðferð heimilda) en nú hefur rektor ákveðið að þau þurfi ekki að gilda í HÍ.

Rithöfundar hafa um árabil barist fyrir lögverndun höfundarréttar og ljóst að réttarkerfið er sammála þeim rétti. Rektor virðist á annarri skoðun.

Það er tóm vitleysa að halda því fram að Hannes Hólmsteinn hafi rýrt traust Háskóla Íslands með vinnubrögðum sínum. Hann hefur aðeins lagt eiginn orðstýr í rúst. Hins vegar er það rektor HÍ sem hefur rýrt traust skólans, svo um munar, með því að sjá ekki sóma sinn í að víkja Hannesi úr starfi.

Hið alþjóðlega fræðasamfélag mun frétta af niðurstöðu háskólarektors - og í kjölfarið spyrja hvort íslenskum fræðimönnum sé treystandi. Rektor hefur ekki aðeins rýrt traust Háskóla Íslands, heldur grafið undan trúverðugleika íslenskra fræðimanna til lengri tíma.

Ætla prófessorar og aðrir fræðimenn við Háskóla Íslands að una því?

 

Átelur vinnubrögð Hannesar